Առաջարկ 1 – մինչև 2 ինտեգրում

Առաջարկ 2 – մինչև 5 ինտեգրում

  1. ՏԱՂԱՎԱՐ – Միջոցառման 3 օրերի համար ձեր ընկերությանը տրամադրվում է տաղավար՝ 3մ*3մ չափսերով, որի մեջ՝ 1 վրան և անվանական բաններ: Տաղավարի տեղն ընտըրվում է վիճակահանության միջոցով: Ստորև ներկայացնում ենք տաղավարի գործունեության մի քանի տարբերակներ, կարող եք վերցնել ցանկացածն,  ամբողջը կամ իրականացրել ավելի արդյունավետ ու ներգրավող ինտեգրումներ
  • Կարող եք ձևավորել ձեր գործունեությունը ցույց տվող բուտաֆորիկ սենյակների, մակետների, կինոթատրոնի, հյուրանոցային սենյակի, խանութի, մարզասրահի և այլնի տեսքով։ Այցելուներին հնարավորություն եք տալիս ձեր տաղավարում ունենալ մատուցվող ծառայության իրական փորձառությունը։
  • Կիրառեք նորարարական մոտեցումներ: VR ակնոցներով այցելուները կարող են զգալ, փորձել ձեր մատուցած ծառայությունը 360° վիրտուալ իրականության մեջ։ 
  • Առաջարկում  ենք տաղավարում ունենալ փրոմոութերներ/ մոդելներ, ովքեր կլինեն ձեր գործունեությանն առնչվող հագուստներով, կերպարներով, կոգեշնչեն միջոցառման մասնակիցներին հետաքրքրվել, օգտվել ձեր ծառայություններից։ 
  • «Երևանի Գինու Օրերի» մասնակից բոլոր ընկերությունները, բացի մարքեթինգային առաջխաղացումից, ունենում են բավականին մեծ վաճառք: Այցելուներին հիմնականում գրավում է հենց միջոցառման տարածքում ներկայացված ընկերություններից օգտվելը, տեղում վայելելը, ցածր գները: Արտադրություն ունեցող ընկերությունների դեպքում հատկապես շահավետ է, վաճառքն իրականացվում է առանց միջնորդավճարների: Այս առաջարկը կարող է հետաքրքրել պանիր, կաթնամթերք, մսամթերք, չիր, չիպս, ընդեղեն, սառեցված մթերք, ձեթ, խմորեղեն, հացաբուլկեղեն, պահածոներ արտադրող ընկերություններին: Ձեզ տրամադրվող տաղավարում հնարավորություն ունեք իրականացնել ձեր ապրանքի կամ ծառայության վաճառք:
  • Սննդի արտադրողների համար տեղում պատրաստման շոու- Առաջարկում ենք ձեր տաղավարում պատրաստել սնունդ միայն ձեր ընկերության ապրանքատեսակներով: Այցելուները կարող են տեղում փորձել պատրաստի ուտեստները, գնել և իրենց հետ տանել վերջինիս բաղադրիչ սննդատեսակները, նաև կիսաֆաբրիկատները: Կարելի է հատուկ մեծ ցուցատախտակներով ցուցադրել, թե ինչ ապրանքատեսականի է օգտագործվում։ Ավելին՝ կարող եք շեֆ-խոհարարի միջոցով շոու կազմակերպել այդ տաղավարում, մրցույթներ կազմակերպել այցելուների հետ, մրցանակներ տրամադրել և այլն։
  • Եթե ձեր գործունեությունը կառուցապատման ոլորտում է, կարող եք կառուցապատվող բնակելի և հասարակական համալիրների ցուցադրման գոտի ստեղծել շենքերի և բնակարանների հատակագծերի մակետների միջոցով: Այցելուներին ներգրավելու համար կարող եք բնակարանի կամ սենյակի ձևով փոքր հատված պատրաստել, որտեղ նրանք կիրականացնեն կառուցապատման աշխատանքներից մինչև ինտերիերի դիզայն և կահավորում՝ ընտրել շինարարական նյութեր, դռներ, հատակի դեկորատիվ սալիկ, պատերի գույներ, պաստառ, կահույք և այլն: Կարող են լինել իրական նյութեր/իրեր կամ դրանց մակետները:
  • Տաղավարում կարող եք տեղադրել էկրան և ցուցադրել ձեր ծառայությունները։
  • Առաջարկում ենք տաղավարում ապահովել նաև ինտերակտիվ խաղային զոնա, օրինակ՝ “Spin the Wheel” խաղը, գինու թեմայով պարզ հարցեր (trivia questions):
  • Ձեզ հնարավորություն ենք տալիս տաղավարում ստեղծել համաբրենդավորված ֆոտո զոնա: Այն ևս այցելուների ներգրավման հետաքրքիր եղանակ է: Այստեղ` տեսանելի մասում պարտադիր պետք է լինի «Երևանի Գինու Օրերի» լոգոն:
  1. ՆԱԽԱՎԱՃԱՌՔ – «Գինին Վայելելու փաթեթների» նախավաճառքը իրականացվում է մոտ 3 ամիս առաջ մեր վեբ կայքի միջոցով 3 փուլով՝ ըստ գնի աճման: Այդ ժամանակահատվածում կայքի այցելությունը շատ է բարձրանում։ Առաջարկում ենք ինտեգրման հետևյալ տարբերակը. նախավաճառքի վերջին՝ 3-րդ փուլում միջոցառման ձեր հաճախորդներին կտրամադրենք 5% քեշբեք/զեղչ։ Առցանց վաճառքի հարթակ, խանութ, հավելված ունենալու դեպքում՝ առաջարկում ենք նախավաճառքն իրականացնել նաև ձեր հարթակում՝ խրախուսելով գնել վերջինիս միջոցով: Մեր կայքում նաև տեղադրում ենք համաբրենդավորված բաններ դեպի ձեր կայք: Նրանք, ովքեր նշված ժամանակահատվածում կկատարեն օնլայն գնումներ ձեր ընկերությունից, կստանան հատուկ պրոմո կոդ, որի միջոցով կկարողանան ձեռք բերել գինին վայելելու փաթեթները հատուկ զեղչով: – Այս կետից չեք կարող օգտվել՝ Գլխավոր Հովանավորի՝ վաճառքի և նախավաճառքի գործընթացում ներգրավված լինելու դեպքում: 
  2. ՀԱՏՈՒԿ ՀԱՃԱԽՈՐԴՆԵՐ– Բոլոր այն հաճախորդներին, որոնք ձեր ընկերության համար ունեն հատուկ կամ պրեմիում կարգավիճակ և տարբերվում են ստանդարտ հաճախորդների խմբից, միջոցառման նախավաճառքի 3-րդ փուլում, միջոցառման օրը փաթեթների վաճառքի տաղավարից և «Երևանի Գինու Օրերի» բրենդավորված պարագաների խանութից կարող են ստանալ 15% զեղչ ցանկացած գնման համար:
  3. ՀԱՄԱԲՐԵՆԴԱՎՈՐՎԱԾ ՆՎԵՐ-ՀԱՎԱՔԱԾՈՒ – Կպարունակի «Երևանի Գինու Օրերի» բրենդավորված գինի և ձեր ընկերության մեկ ապրանքատեսակ՝ մեր համատեղ լոգոներով: Հավաքածուն կվաճառվի մեր կայքի նախավաճառք բաժնում (նախավաճառքի խթանումը սկսվում է միջոցառումից մոտ 3 ամիս առաջ), կվաճառվի նաև միջոցառման օրը «Երևանի Գինու Օրերի» բրենդավորված գինու տաղավարում բացառիկ գնով: Փաթեթը կարող է ներառել օրինակ՝ հուշանվեր, գուլպա, շոկոլադ, պանիր, ֆիլմի ցուցադրության տոմսակ և այլն:
  4. ԹԻՐԱԽԱՎՈՐՎԱԾ ԱՌԱՋԱՐԿ ՄԵՐ ՄԱՍՆԱԿԻՑՆԵՐԻ ՍԵԳՄԵՆՏԻՆ – Եթե ձեր որևէ ծառայության կամ ապրանքի պոտենցիալ սպառողն են հանդիսանում մեր մասնակիցները՝ գինեգործներ, HoReCa  սեգմենտ, ապա հնարավորություն ենք տալիս մասնակիցների հետ գլխավոր հանդիպման ժամանակ շնորհանդեսով ելույթ ունենալ Երևանի Գինու Օրերի բոլոր բիզնես մասնակիցների առջև: Շնորհանդեսը պարունակելու է ձեր ապրանքատեսականու, ծառայության, գների, հատուկ առաջարկների մասին տեղեկատվություն:
  5. ՆՎԵՐՆԵՐ ԳՈՐԾԸՆԿԵՐՈՋԻՑ, ԶԵՂՉԻ ՔԱՐՏԵՐ – Որպեսզի ապահովենք հաճախորդների ներգրավվածությունը ոչ միայն միջոցառման օրը, այլ նաև դրանից հետո, մեր կողմից միջոցառմանը կազմակերպվող մրցույթների շահումների շարքում ևս կարող ենք ներառել նվերներ գործընկերոջից, զեղչի քարտեր:
  6. ԳՐՔՈՒՅԿ – «Գինին Վայելելու փաթեթի» գրքույկում ձեզ տրամադրում ենք ինֆորմացիոն էջ և հատուկ առաջարկի էջ: Վերջինս կարող է լինել առաքման, զեղչի, ակցիայի մասին: Ստորև ներկայացնում ենք հատուկ առաջարկի տարբերակներ՝
  • Գինին վայելելու փաթեթների մեջ (11,000 օրինակ) հնարավորություն ենք տալիս տեղադրել ձեր հատուկ կտրոնը, որով այցելուները կարող են մոտենալ ձեր տաղավար և ստանալ մեկ փոքր նվեր` գնում կատարելու դեպքում կամ գուցե առանց գնում կատարելու։ Այս կերպ նրանց ուղորդում ենք տաղավար, որտեղ բացի կտրոնն օգտագործելուց, շատերը կկատարեն նաև այլ գնումներ: 
  • Մեկ այլ տարբերակ է տեղում փաթեթ ունեցողներին հատուկ զեղչ տրամադրելը: 
  • ԽԱՂԱՐԿՈՒԹՅՈՒՆ – Առաջարկում ենք գինին վայելելու փաթեթի մասը կազմող գրքույկի մեջ ունենալ խաղարկության կտրոնի էջ: Անհրաժեշտ է կտրոնը մոտեցնել ձեր տաղավար, ապա նշանակված ժամին մոտենալ խաղարկությանը մասնակցելու: Խաղարկությունը նույնիսկ կարող եք իրականացնել միջոցառումից հետո ձեր աշխատանքային տարածքում կամ որևէ կոնֆերանս սրահում։
  1. ՖԼԵՇՄՈԲԵՐ – Կարող եք միջոցառման ընթացքում օրական մեկ անգամ, 15-20 րոպե անցկացնել ֆլեշմոբ ակցիա։ 
  2. ՊՐՈՄՈ ԱԿՑԻԱՆԵՐ – Միջոցառման տարածքում կարող եք ունենալ ԲԹԼ աշխատակիցներ, որոնք պետք է համաբրենդավորված շապիկներով լինեն, հիմնական գործառույթը՝ տեղեկացնել այցելուներին ձեր գործունեության մասին, թռուցիկներ բաժանել, պրոմո ակցիայով ներգրավել այցելուներին դեպի ձեր տաղավար։ 
  3. ՏԵՍԱՀՈԼՈՎԱԿ  – Միջոցառման գլխավոր տեսահոլովակի մեջ գրավոր նշվում է գործընկերության մասին, և տեղադրվում են լավ  տեսանելի կադրեր։ Այն լայն տարածում է գտնում միջոցառման և՛ մասնակիցների, և՛ այցելուների կողմից, ինչպես նաև, հետագայում դառնում է միջազգային տուրիստական հարթակներում, էքսպոներում տուրիստական Հայաստանը ներկայացնող լավագույն գործիքը։
  4. ՄՌ ԲԱԺՆԻ ԻՆՏԵԳՐՈՒՄ – 10 հատ «Գինին Վայելելու» փաթեթներ նվիրում ենք ձեր մենեջերիալ անձնակազմին, առաքում ենք մեկ վայր միջոցառումից առաջ։ Ձեր աշխատակիցներին տրամադրում ենք 20% զեղչ՝ «Գինին Վայելելու» փաթեթները 1000+ հատ նախօրոք ձեռք բերելու դեպքում։ Առաքում ենք մեկ վայր միջոցառումից առաջ։

Առաջարկ III

ԵՐԿՐՈՐԴ ԲՐԵՆԴԻ ՆԵՐԿԱՅՈՒԹՅՈՒՆԸ ՁԵՐ ՏԱՂԱՎԱՐՈՒՄ –  Եթե ձեր ընկերության գործունեության առաջխաղացման համար անհրաժեշտ է մեկ այլ ընկերության ներկայությունը, ապա թույլ ենք տալիս ձեր տաղավարում ունենալ այդ ընկերության մասին տեղեկատվություն, վիզուալներ, ներկայացուցիչ, օրինակ՝ ապահովագրական կազմակերպություն։ Բացառվում է ֆինանսավարկային, վճարահաշվարկային ընկերությունների մասնակցությունն այստեղ:

Առաջարկ IV

ԲԱՐԵԳՈՐԾԱԿԱՆ ԱՐՇԱՎ – Մեր բարեգործական գոտում ներկայացված են լինելու զինվորների առողջությանը, վերականգնմանը և ուսուցմանն ուղղված գործունեություն ծավալող ընկերություններ, որոնք ներկայացնելու են իրենց պրոդուկտները, ծրագրերը, դրամահավաք են կազմակերպելու: Առաջարկում ենք ձեզ դառնալ այս գոտու անվանական գործընկերը: Ձեր ընկերության լոգոն տեղադրվում է այս գոտու բոլոր մասնակիցների տաղավարների բաններների վրա և այդ հատվածում տեղադրվում է մեծ պոստեր:  Սոցիալական ցանցերում, մեդիային և բարեգործական ընկերություններին ուղարկվող բոլոր թարմացումներում նշվում է, որ այս գոտու իրականացումը հնարավոր է դարձել ձեր գործընկերության շնորհիվ:

Առաջարկ V

ՍԱՐՔԱՎՈՐՄԱՆ ՑՈՒՑԱԴՐՈՒԹՅՈՒՆ – «Երևանի Գինու Օրերի» 3 օրերին ձեզ տրամադրվում է առանձին տարածք՝ 3մ*3մ չափսերով, որտեղ կարող եք ցուցադրել սարքավորում, հոսքագիծ, ավտոմեքենա, ռոբոտ, ինչը հնարավորություն կտա ներկայացնել վերջինիս հնարավորությունները և հենց տեղում նաև ձեռքբերման պայմանները։

Առաջարկ VI

«ԳԻՆԻՆ ՎԱՅԵԼԵԼՈՒ» ՓԱԹԵԹԻ ՄԵՋ ԹՌՈՒՑԻԿԻ ԱՌԿԱՅՈՒԹՅՈՒՆ – Առաջարկում ենք «Գինին Վայելելու» փաթեթի մեջ ներառել ձեր ընկերության գովազդային թռուցիկ՝ մեկական օրինակ յուրաքանչյուր փաթեթում, օրինակ՝ նվեր քարտ, որևէ սակագնային փաթեթ, հատուկ առաջարկ և այլն: Մենք կատարել ենք մեր այցելուների սեգմենտավորված պրոֆեսիոնալ վերլուծություն, որով կկիսվենք ձեզ հետ: Այն կօգնի  մեզ և ձեզ միջոցառման այցելուների շրջանում գտնել ձեր կողմից թիրախավորված հաճախորդին: «Գինին Վայելելու» փաթեթները լինելու են 11,000 օրինակով: Թռուցիկի չափսերը տրամադրում ենք մենք ավելի ուշ: Թռուցիկները տրամադրում եք դուք:

Առաջարկ VII

ԿԱՐՎԱԾ Է ԳՈՐԾԸՆԿԵՐՈՋ ԿՈՂՄԻՑ – այս միջոցառման խորհրդանիշը դարձած «Գինին Վայելելու» փաթեթների արտաքին «փաթեթավորման» ամենատեսանելի տարրը կտորե պատյանն է: Առաջարկում ենք՝ պատյանները կարվեն և միջոցառման լոգոյով տպագրվեն ձեր ընկերության կողմից՝ պատյանի հիմքային հատվածում  դնելով «պատրաստված է … կողմից» պիտակը՝ առավելագույնը 5սմ*2սմ չափսերով: Յուրաքանչյուր պատյանի մեջ կարող ենք տեղադրել նաև ձեր ընկերության մասին պատմող տպագիր թռուցիկներ։ Պատյանների դիզայնը պետք է հաստատվի մեր կողմից։ Պատյանները պետք է կարվեն 11,000 օրինակով։ Այս առաջարկը բարտերային համագործակցության առաջարկ է՝ մենք չենք վճարում կարելու և տպագրելու համար, դուք չեք վճարում պիտակի և թռուցիկների տեղադրման համար։ Ի գիտություն՝ պատյանի վրա լավ տեսանելի հատվածում տպագրված են լինելու և՛ միջոցառման, և՛ գլխավոր հովանավորի լոգոները:

Առաջարկ VIII

ՔՎԵՍՏ-ՈՐՈՆՈՒՄ ԽԱՂ – առաջարկում ենք մարքեթինգային հետաքրքիր գործիք՝ խաղ-քվեստ, որը ուղղակիորեն կխթանի ձեր վաճառքները, ճանաչելիությունը, խանութների այցելությունը, միևնույն ժամանակ մասնակիցներին կպարգևի էմոցիոնալ բավարարվածություն: Ինչպե՞ս: Քվեստը բաղկացած է մի քանի փուլերից: Հատուկ տեղերում թաքնված QR կոդերով և chat bot-ի օգնությամբ մասնակիցներին տրվում են առաջադրանքներ, օր.՝ կատարել ցանկացած գնում ձեր ընկերությունից: Հաջորդ փուլում պետք է ճիշտ պատասխանել հարցերին: Հարցերը կարող ենք մշակել միասին: Ընդ որում, յուրաքանչյուր փուլին անցումը հնարավոր է միայն նախորդի ճիշտ կատարման դեպքում: Առաջին 20-30 մասնակիցները, որոնք բարեհաջող կանցնեն բոլոր փուլերը, կճանաչվեն հաղթող և կստանան մրցանակներ, օր.՝ բրենդավորված գինի, «Գինին Վայելելու» փաթեթներ մեր կողմից կամ ձեր ընկերության նվեր-քարտեր: Կարող են լինել նաև մրցանակներ՝ ըստ հաղթահարած փուլերի:

Առաջարկ IX

“YEREWINEDAYS LOOK” ՖՈՏՈ ՄՐՑՈՒՅԹ – Հետաքրքիր ավանդույթ է ձևավորվել մեր միջոցառման ժամանակ մարդիկ հագնում են ու ներկայանում շատ ոճային հագուստներով։ Մենք այս երևույթը չենք ցանկանում անտեսել և մեր այցելուների համար հաճելի անակնկալ ենք կազմակերպում, որն անպայման մեծ արձագանք է ստանալու։ Այս նախագծի համար աշխատելու է առանձին լուսանկարիչների խումբ: Իրականացվելու է հատուկ մարքեթինգային արշավ: Միջոցառման օրերին մեր լուսանկարիչները «որսալու» են ամենազիլ ու ամենաոճային հագուկապով ներկայացած այցելուներին։ Լուսանկարները հայտնվելու են մեր սոցիալական էջերում և դրվելու են հանրային քննարկման: Կազմվելու է “YereWineDays Look” առցանց կատալոգ: Ամենաշատ “ձայներ” հավաքած 50-80 կերպարները հայտնվելու են կատալոգում, որը ևս ակտիվ տարածվելու է սոցիալական ցանցերում: Այցելուներին գրավում է Գինու Օրերի համայնքի մասը դառնալու միտքը՝ հայտնվել սիրելի միջոցառման ամենաոճային կատալոգում, ինչն էլ խթան է հանդիսանում նրանց կողմից կատալոգը տարածելու: Առաջարկում ենք ձեզ դառնալ միջոցառման այս հատվածի գործընկեր։ Առցանց կատալոգի բոլոր էջերում տեղադրվում է ձեր լոգոն, ձեր մասին տեղեկատվություն, հղումներ դեպի ձեր վաճառքի կամ սոցիալական հարթակներ, 2023թ. «Երևանի Գինու Օրերի» look-երի առաջարկներ և այլն:  Կարող են լինել նաև ձեր բրենդավորված հագուստներով կերպարներ: Ընտրված մի քանի մասնակցի կարող եք նվերներ կամ նվեր-քարտեր տրամադրել ձեր կողմից։ Հետագայում կարող ենք նորաձևության որևէ հարթակի հետ “YereWineDays Լook sponsored by …” հոդված հրատարակել։



ՈՒՇԱԴՐՈՒԹՅՈՒՆ! 

  • Ցանկացած համագործակցության առաջարկից օգտվելու դեպքում՝ միջոցառումից առաջ և հետո հատուկ բրենդավորված առցանց պոստերով կատարվում է գրառում ձեր ընկերության մասին մեր սոցիալական էջերում: Ձեր լոգոն ներառված է լինելու տպագիր և առցանց այն նյութերում, ներառյալ միջոցառման վեբ կայքը, որտեղ հատուկ հատվածում արտացոլվում են բոլոր գործընկերների լոգոները: 
  • Յուրաքանչյուր ինտեգրման տարբերակ պատրաստ ենք քննարկումների և ձևափոխումների շնորհիվ առավել փոխշահավետ դարձնել:
  • Եթե մինչ այս չեք ստացել ձեր ընկերության համար հատուկ մշակված Գլխավոր Հովանավորի առաջարկը՝ խնդրում ենք կապ հաստատել մեզ հետ։ Մենք կարճ ժամանակահատվածում կուսումնասիրենք ձեր ընկերությունը և կտրամադրենք հատուկ մշակված առաջարկ։

 

© Երևանի Գինու Օրերին մնացին հաշված օրեր Շտապի՜ր

Բաժանորդագրվել նորություններին